Френки де Йонг қатардан шықты

«Барселона» ойыншысы Френки де Йонг жарақат алды

28 жастағы жартылай қорғаушы жамбас бұлшық етін зақымдап алыпты. Осыған байланысты Нидерланд құрамасы қосынынан кетіп, кеше Барселонада медициналық тексерістен өтті.

Нәтижесінде Ла Лиганың 4-туры аясындағы «Валенсиямен» ойынға қатыспайтыны белгілі болды. Ал Чемпиондар лигасындағы «Ньюкаслға» қарсы матчта алаңға шығу-шықпауы әзірге нақтыланбады. Бәрі Де Йонгтың қалыпқа келу қарқынына байланысты екен.

Чемпиондар лигасының алғашқы туры аясында өтетін «Ньюкасл» – «Барселона» кездесуі 18 қыркүйекке жоспарланған.

Де Йонг биылғы маусымда екі ойын өткізіп үлгерді. Бірақ нәтижелі әрекетімен көзге түсе алған жоқ.