Шотландияның «Селтигі» 5700 шақырымды артқа тастап, Алматыға келді. Олар «Қайратпен» екеуара Чемпиондар лигасы негізгі кезеңінің жолдамасын сарапқа салады. Клубын қолдау үшін сонау Франкфурт-Стамбул-Астана-Алматы бағытында ұшып келген жанкүйерлер де бар. Олар елорданы кішігірім Дубайға теңеп, артынша Медеуді бетке алмақ

Глазгодан жеткен сәлем

Иә, 26 тамыз күні Алматы жұрты алғаш рет «Орталық стадионда» Чемпиондар лигасы гимнін естиді. Мұндай толқынысты сәт бұрын-соңды туған жоқ. Сондықтан «Қайрат» жігіттері не бел, не белбеу кететінін біліп жүр. Осы ретте  белгілі спорт журналисі Ермұхамед Мәулен «Селтик» жанкүйерімен сұхбаттасып, оның матч туралы болжамын сұраған. Қазақстанға алғаш рет ат басын бұрған Джон ойын алдында қобалжып тұрғанын жасырмады. Өйткені шотландиялық команданың Еуропадағы өнеріне көңілі толмай жүр. Ол шабуылшы Дайзен Маэда алда ойнаса, үзілістен кейін бірнеше гол соғамыз деп отыр. Оның ойынша,  2:0 есебімен Глазгодан келген команда жеңіске жетеді.

Сондай-ақ «Селтик» жанкүйері Франкфурт-Стамбул-Астана бағытында ұшып келіп, елордада тыныққан. Джонға қала тынысы, көшесі ұнапты. Астананың зәулім ғимаратына қарап, кішігірім Дубайға ұқсайтынын айтқан. Журналистке берген сұхбатында, 25 тамыз күні Алматыға ұшып, сол күні Медеуді аралайтынын айтқан екен. Алатау бөктеріндегі қала жайлы білетінін, әсіресе әдемі тау көрінісін тамашалауға кетіп бара жатқанын жеткізген.

Байқағаныңыздай, шотландиялықтар елге бекер келмеген. Бапкерінің де, қолдаушысының да бар ойы – жеңіс. «Қайраттың» бас бапкері Рафаэль Уразбахтин де «Селтиктің» алғашқы кездесуде алматылық клубты бағаламағанын айтады. Яғни, қарымта матч біз ойлағаннан басқаша өрбуі мүмкін.  

«Бұл ойында «Селтик» есесін қайтаруға тырысады. Соған дайын болу керек. Олар барын салады. Біз де аянып қалмаймыз. Білесіздер, шотландиялық клубтағы бір футболшының бағасы – күллі «Қайраттың» құнына тең. Шабуыл шебіндегі бар ойыншысынан қауіптенуге болады. Сондықтан қандай сценарий болмасын, дайынбыз. Матч пенальтиге жалғасса да, соңына дейін күресеміз. «Орталық стадионда» жанкүйер жадында сақталатын кездесу өткізуге тырысамыз», – деді баспасөз мәслихатында «Қайраттың» бас бапкері.

Сонымен, ойынға «Қайрат» сапынан сары қағазға байланысты Дастан Сәтпаев, жарақаты бар Сантана мен Жоау Паулу алаңға шықпайды. Уразбахтиннің айтуынша, Сәтпаев ойынға қатыса алмайтынына қатты қынжылған. Екі күн ешкіммен сөйлеспей, оқшаулау жүрген.

Оған қоса қақпашы Заруций тізесінен жарақат алып, оның орнына Темірлан Анарбеков шығады. Бұл 21 жастағы қақпашы үшін тамаша мүмкіндік. Өткен ойында басы жарылып жатса да, қасқайып қарсы тұра білді. Бір сейв жасап үлгерді. Сейсенбідегі кездесуде де бар өнерін салады деп ойлаймыз.

Бір голдың  соғылары анық, бірақ...

Айталық, Брендан  Роджерс Алматыға бекер келген жоқ. Бірінші матчтан кейін-ақ, жинақталатынын, келесіде мұндай ойын көрсетпейтінін айтқан. «Қайрат» қамшылады ма, Шотландия чемпионатында «Ливингстонды» 3:0 есебімен жеңген. Алматыға 25 тамыз күні жетіп, дайындыққа кіріскен. Бапкердің жігіттерін бір сыбап алғаны анық. Өйткені «Селтик паркте» өткен матчта жанкүйерлер наразы болды. Әуелде «Қайратты» қалпақпен қағып аламыз деп ойлағаны рас. Оған алматылық клуб офсайдан салған бір голмен, жанкешті ойынымен жауап берді.

«Негізі, «Қайрат» - «Селтик» ойынына болжам жасау қиын. Бәріміз жергілікті клубқа жанкүйер боламыз. Обьективті түрде қарасақ, «Селтик» – өте мықты команда. Олардың Алматыға жеңіс үшін келгені түсінікті. Позитив сценарий десек, «Қайрат» үшін гол жібермей, қақпасын құрғақ ұстау міндеті тұр. Әйтіп-бүйтіп жүріп бір гол соғып алу жағы тағы бар. Өйткені бірінші матчта қорғаныста тамаша ойын көрсетті. Тек қана айып алаңына жатып алмай, жылдам қарымта шабуыл жасады. Оған қоса стандартта да мүмкіндігін пайдалануға тырысты. «Қайрат» 1:0 есебімен жеңіске жетеді деп ойлаймын. Десе де, қиын матч күтіп тұр. Алға, «Қайрат!» – деді «Cоққы және гол!» эксперті Дидар Есемов.

Болжам жасау барысында, басқа да нұсқаны қарастырып көрдік. Егер «Селтик» жылдам шабуылдап, гол соқса қалай болатынын талдадық. Сарапшылардың айтуынша, мұндайда «Қайратқа» қасық қаны қалғанша шабуылдауға тура келеді. 

«Қайрат» - «Селтик» ойынына болжам айту қиын. Әгәрәки, бірінші голды «Селтик» соқса, «Қайрат» тек шабуылдайды. Артқа шегінерге жол болмайды. Есепті кем дегенде теңестіру үшін ойнайды, барын салады. Бұрыштама көтереді, стандарт ситуациясын өз пайдасына шешуге тырысады. Допқа көбірек иелік ете бастайды. Есепті теңестіріп алса, экстра-таймға жетудің бар амалын жасауға тырысады», – деді футбол сарапшысы Ермұхамед Мәулен.

Белгілі комментатор Ермұхамед Мәулен де әріптесінің сөзімен келіседі. «Қайраттың» бір доп айырмасымен жеңіске жететініне сенеді. «Сары-қаралардың» алғашқы ойындағыдай қорғанысқа көбірек көңіл бөлетіні үшін Мартынович сияқты қорғаушылардың ұрымтал тұсты жібермегені абзал. Эдмилсондай шабуылшылардың барын салғаны керек. Сондай-ақ Дидар Есемов Уразбахтин шәкірттерін жанкүйер қолдауына мас болмай, эйфорияға берілмей ойнайды деп отыр. Дастан Сәтпаевтың алаңға шықпайтынын аса әсер етпейтінін, шабуылда Рикардиньо, Жоржиньо барын атап өтті. Бірақ «Селтик» гол соғып кетсе, Сәтпаевтың импровизациясы, алаңда амал тауып кетер шеберлігі жетпей тұратынын айтты.

«Селтиктің» осыған дейін Қазақстанға үш рет келгені тағы бар. Үшеуінде де жолы болмады. 2013 жылы «Шахтер» «жасылдарды» 2:0 есебімен тізе бүктірген. Одан кейін екі рет «Астанаға» қарсы матч өткізіп, 2016 жылы тең тарқасса, 2017 жылы 4:3 есебімен жеңілді.

«Орталық стадиондағы» тарихи матчтың төрешісі – Маурицио Мариани. Одан бөлек, үш төреші мен бейнеқайталауға жауапты екі төреші бар. Ал статистикаға келсек, «Селтик» сырт алаңдағы кейінгі төрт ойында жеңілмеген. Үш рет жеңіске жетіп, бір рет тең ойнаған. «Қайрат» болса, «Орталық стадионда» өткен кейінгі үш ойында жеңілмеді. Сондай-ақ, Чемпиондар лигасы аясында «Олимпиядан», «КуПс» пен «Слованнан» да басым түсті. Әттеген-айы чемпионатта «Елімайға» есе жіберді. Сөйте тұра «Селтик паркте» Глазго жұртымен «шайқасып» қайтты. Шотландиялық клубпен ұрыстың жақын екенін топшылаған «Оқжетпес» жігіттік жасап, чемпионаттағы кездесуді кейінге қалдырды. Естеріңізде болса, «Астана» да «Лозаннамен» қарымта матч алдында ҚПЛ-ді кейінге шегерген еді. Бірақ нәтиже көңіл көншітпеді. Ал алматылық жігіттерге демалыс жақты ма, жоқ па сейсенбі күні белгілі болады.

Айзат Айдарқызы. Айқын газеті, 26.08.25