«Қайраттың» негізгі футболшысы жарақат алды

«Қайрат» «Селтикке» қарсы матч қарсаңында тағы бір ойыншысынан айырылып қалуы мүмкін

BorodAbata.kz мәліметінше, Эдмилсон жаттығу кезінде жарақат алып қалыпты. Бразилиялық шабуылшының бүгінгі ойынға қатысуы екіталай екен.

Ал Луиш Мата керісінше қатарға қосылды. Португалиялық қорғаушы ауырсынуды басатын дәрілердің көмегімен алаңға шығуға дайын.

Осыған дейін алматылық ұжым сапында Александр Заруцкий мен Гиорги Зария жарақат алып қалған болатын. Сонымен қатар, сары қағаздың көптігіне байланысты Дастан Сәтпаев та қарымта ойында төбе көрсету мүмкіндігінен айырылды.

Айта кетейік, «Қайрат» пен «Селтик» арасындағы Глазгода өткен алғашқы кездесуде есеп ашылмай, 0:0 есебі тіркелген еді. Енді Чемпиондар лигасының жолдамасы Алатау бөктерінде сарапқа салынады. Алматыдағы «Орталық» стадионда өтетін кездесу бүгін, 26 тамыз сағат 21:45-те басталады.