Қазақстанда жеребе тарту рәсімін QazSport пен Q League телеарналары көрсетті. Q League эфирінде мен жүргіздім

Екі күннен бері түрлі сауалнамада жанкүйерлердің тілегі «Реал Мадрид» немесе «Барселона» болды. Златан Ибрагимович шардан «Реал Мадрид» деп жазылған қағазды шығарғанда бәрі тынысын тартып, бір сәт үндемей қалды. Үміт – қарсыластардың тізімінен «Қайрат» деген жазуды көру. Сондай жазуды көрдік.

Бүкіл ел шаттанып жатқанда эфирде эмоциямды тым қатты білдірмей, репортаж мәдениетіне сай ғана қуандым. Әйтпесе ішім алай-дүлей. Өмірімнің 21 жылында жанкүйерлік еткен клуб Қазақстанға келеді. Жеребе кезінде «Реал» қай құрамын әкеледі, матч қайда өтеді – еш нәрсе маңызды болмады. Маңыздысы, «патша клубы» «халық командасына» қонақтайды. Тілегенім де сол болған. 2015 жылы «Астана» тұңғыш болып ЧЛ-ға шыққанда да күтіп едім, бірақ «Реалдың» Мадридтегі көршісі түсіп, қапаланғаным есімде.

Жеребе рәсімін жалғастырып, эфирде барлық қарсыласты анықтап жатқанда миымның бір түкпірінде «Қайрат» пен «Реал Мадрид» кездеседі деген ой әлі тербеліп жүрді. Бұрын бала кезімізде аулада отырып айтатын әңгіме секілді. Әйтпесе, «Қайрат» пен «Реал Мадрид» кездеседі» деген ойға әлі толық сенбей отырдым. Өтірік сияқты.

Жеребе аяқталған соң телефонымды бір қарадым. Әлеуметтік желіде жазған, қоңырау шалған адам ұшан-теңіз. «Реал Мадрид» жанкүйері екенімді білетіндер құттықтап жатыр. Кейбірі билет сұрап жатыр.

Жиі қойылған сұрақ: «Қайратқа» жанкүйер боласың ба, «Реал Мадридке» ме? Әрине, «Қайратқа». «Мадрид» ренжи қоймас, ол үшін бұл көп матчтың бірі. Ал «Қайрат» үшін тарихи матч. Еурокубок кезінде біздің кез келген клубымызға Қазақстан ұлттық құрамасы секілді қараймын. Олар қазір өз қаласының емес, бүкіл Қазақстанның намысын қорғап жатыр. Мұндайда таңдау да болмауға тиіс.

«Сантьяго Бернабеуді» көрдім, енді «Реалды» көрсем»

Өткенде ғана Мадридке жол түсіп, «Бернабеу турына» барғанмын. Музейін аралап, «Реалдың» тарихына көз жүгіртіп, Чемпиондар лигасы кубоктары мен «Алтын доптарын» көрдім.

Өкініштісі, ол уақытта «Реалдың» өзінде матч болған жоқ. Сондықтан, тек аңызға айналған стадионның өзін көріп қайттым. Ол кезде маусым басталуына екі-үш күн қалған-ды.

Сол кезде оқырмандарым «Стадионын көрдіңіз, енді «Реал Мадридтің» өзін көріңіз» деген тілек айтқан еді. Шын жүректен тілеген шығар, ол да бұйырып тұр. Футболшылардың өздері-ақ мен тұратын қалаға келеді. Одан артық қандай мүмкіндік керек?

«Реал Мадрид» қай құрамды әкеледі?

Қазір жиі қойылып жатқан сұрақ – осы. «Реал» былтырғы «Челси» секілді жастарын жібере салатын шығар деген пікірлерді оқып қалдым. Бәрі ойынның қашан және қай турда өтетініне де байланысты.

Чемпиондар лигасында әдетте командалар екінші құрам шығарып тәуекелге бармайды. Себебі бұл жақта әлсіз клуб жоқ. Егер алғашқы 4-5 турда кездесетін болса, әр үш ұпай маңызды, мадридтіктер негізгі құрамын әкеледі. 

Тек үшінші турда жолықпаса, әрине. Себебі бұл турдың матчтары 21-22 қазанға жоспарланған. Ал 26 қазанда «Сантьяго Бернабеуде» Эль-класико күтіп тұр. Бұл жағдайда «Реал», расымен, Алматыға көшбасшыларын жібермеуі ықтимал.

Сондықтан, бірінші (16-18 қыркүйек), екінші (30 қыркүйек – 1 қазан), төртінші (4-5 қараша), бесінші (25-26 қараша) турда ойнаса, «Реал» негізгі құрамын әкелеуі бек мүмкін. 6-8-турлардың ойындары желтоқсан мен қаңтарға жоспарланған. Алматының ауа райын көріп, шошып, біраз көшбасшыны жылы Мадридте қалдырып кетуі де ғажап емес.

Қалай болғанда да, қандай құрам келсе де, тарихта «Қайрат» пен «Реал Мадрид» матчы болып сақталып қалады.

Ал «Қайрат» - «Реал Мадрид» матчы қашан және қайта өтеді, оны бұған дейін сайтымызда жазғанбыз. Осы сілтеме арқылы оқи аласыздар.