Жотаның нөмірі кімге бұйырғаны белгілі болды

Диогу Жотаның Португалия құрамасындағы нөмірін Рубен Невеш иеленді

Бұл туралы команданың бас бапкері Роберто Мартинес мәлімдеді:

— «Диогу – бірліктің символы. Ол әлем чемпионатын жеңуді армандады. Біз Жотаның қалауын орындау үшін аянып қалмаймыз.

21-нөмірлі жейдені енді Рубен Невеш киеді. Рубен әрқашан Жотамен жақсы қарым-қатынаста болды. Сондықтан, ол – Жотаның нөмірін арқалауға әбден лайық адам. Бұл – менің де, федерацияның да қалауы емес. Бұл – Жотаның отбасының шешімі», – деді Мартинес.

Диогу Жота шілде айының басында бауыры Андре Силвамен бірге жол апатына ұшырап, қаза тапқан еді.

Жотаның «Ливерпульдегі» 20-нөмірі мәңгілікке қолданыстан шығарылған болатын. Ал халықаралық футболда UEFA мен FIFA ережелеріне сәйкес, ойын нөмірлері ешкімнің атына бекітілмейді.