Жеребе қай күні өтеді? Қандай клубтар түсуі мүмкін? Ойындар қашан басталады?

«Қайрат» тарихында алғаш рет Чемпиондар лигасына жолдама алды. Енді ықтимал қарсыластары мен маңызды күндер туралы сөз қозғауға болады

Бүгін, 27 тамыз, Чемпиондар лигасының барлық қатысушысы белгілі болып, 28 тамыз күні жеребе тарту рәсімі өтеді.

Бірінші қоржында 100% «ПСЖ», «Реал», «Манчестер Сити», «Бавария», «Ливерпуль», «Интер», «Челси», «Боруссия Д» және «Барселона» болады.

Екінші қоржында «Арсенал», «Байер», «Атлетико», «Аталанта», «Вильярреал», «Ювентус» және «Айнтрахт Ф» бар.

Үшінші қоржынға «Тоттенхэм», «ПСВ», «Аякс», «Наполи», «Спортинг», «Олимпиакос», «Славия» (Прага) және «Марсель» орналасқан.

Ал төртінші қоржындағы клубтар: «Монако», «Галатасарай», «Юнион», «Атлетик» және «Ньюкасл».

«Қайратқа» әр қоржыннан екі клубтан түседі және соның біреуімен міндетті түрде өз алаңында ойнайды. Сондықтан Алматыға Еуропаның азулы командалары келейін деп тұр.

Негізгі кезең 16 қыркүйек күні басталып, 28 қаңтарға дейін жалғасады. Бұл раундта әр клуб сегіз ойыннан өткізеді. Оның төртеуін өз алаңында қабылдаса, төртеуі түзде болады.

• 1-тур: 16-18 қыркүйек

• 2-тур: 30 қыркүйек – 1 қазан

• 3-тур: 21-22 қазан

• 4-тур: 4-5 қараша

• 5-тур: 25-26 қараша

• 6-тур: 9-10 желтоқсан

• 7-тур: 20-21 қаңтар

• 8-тур: 28 қаңтар.

Ал ақпан айында плей-офф кезеңі басталады.

• 1/16 финал: 17-18 және 24-25 ақпан

• 1/8 финал: 10-11 және 17-18 наурыз

• 1/4 финал: 7-8 және 14-15 сәуір

• 1/2 финал: 28-29 сәуір және 5-6 мамыр

• Финал: 30 мамыр («Пушкаш Арена», Будапешт).

Естеріңізге сала кетсек, 1/8 финалға тікелей үздік сегіз клуб шығады. Ал 9-24-орын аралығында командалар қосымша екі матч өткізіп, 1/8 финал жолдамасын сарапқа салады. Ал 25-36-орынға тұрақтағандар үшін маусым бірден аяқталады.

Ал «Орталық» стадионда UEFA-ның төртінші санаты бар. Сондықтан барлық матч Алматыда өтеді және клуб негізгі кезеңге тек бір стадион тіркей алады. Бірақ белгілі бір жағдайларға байланысты UEFA аренаны өзгертуі мүмкін.

Сондай-ақ бұл «Қайраттың» еурокубокта алғаш ойнауы емес екенін де айта кеткен жөн. «Сары-қаралар» 2021/22 жылғы маусымда Конференция лигасының топтық кезеңінде бақ сынаған.

H тобында «Базель», «Қарабах» және «Омониямен» күш сынасып, бар-жоғы екі ұпай жинаған еді.