Шерхан Қалмырзаның трансферлік құны белгілі болды

Transfermarkt «Қайрат» ойыншысы Шерхан Қалмырзаның нарықтағы құнын бекітті

Танымал неміс порталы 18 жастағы қазақстандық қақпашыны 200 мың еуроға (128 млн теңге) бағалап отыр.

Қалмырза түнеугүні «Спортингке» (1:4) қарсы ойында Чемпиондар лигасындағы дебютін жасап, Мортен Хюльманн орындаған пенальтиді сәтті тойтарған еді.

Енді 30 қыркүйекте Алматыда өтетін мадридтік «Реалға» қарсы ойында Шерхан қайтадан ел намысын қорғайды деп күтілуде.

Қалмырза – «Қайрат» академиясының түлегі. «Қайрат U18» командасымен бірге екі дүркін (2023, 2024) QJ League чемпионы атанған. Негізгі командадағы дебютін өткен жексенбіде ҚПЛ аясындағы «Ақтөбеге» (1:0) қарсы ойында жасады.