«Қайрат» тарихында алғаш рет Чемпиондар лигасының жалпы кезеңіне өтті. «Орталық» стадионда Шотландияның «Селтигін» қапы қалдырып, Еуропаға жорығын жалғастырды. Араға тура 10 жыл салып, қазақ баласы бәсі биік турнирге қайта оралды. Кельттердің қазақ жерінде жеңіске жете алмай келе жатқаны тағы бар

Еуропаға жорық жалғасады

Иә, дәл 26 тамыз 2015 жылы «Астана» сырт алаңда «АПОЭЛ-мен» тең ойнап, ЧЛ-дің топтық кезеңіне жолдама алған еді. Арада 10 жыл өткенде «Қайрат» ерлеп, Брендан Роджерстің командасын еліне қайтарды. УЕФА ұсынған статистика бойынша, матчтағы ең жоғары ұпай Темірлан Анарбекке (4,8), одан кейін Еркін Тапаловқа (4,6) тиесілі. Жалпы, көшесі көшпес баққа апаратын қалада Уразбахтиннің шәкірттеріне бақ қонды.

Айталық, бұл «Қайраттың» ұзақ күткен жеңісі. Бұған ойыннан кейінгі Қайрат Боранбаевтың көз жасы куә. Алматы түнін азан-қазан етіп, күллі қазақты көк жәшікке телмірткен ойын ойдағыдай өтті. Себебі, алматылық клубқа тура Глазгодағыдай міндет жүктелген. Қорғаныста сақ қимылдап, амалын тапса қарсылас қақпасынан саңылау табу керек-ті. Көргеніңіздей, кельттер де, қазақтар да алдырған жоқ. Матчты «Алатауфанс» перфомансындағы (road to Europe) Атилла көріп тұрғандай әсер қалдырды. Жанкүйер дем берді, білем, сол күні 38 жасқа толған Мартынович қамшы салдырмады. Тіпті, 90 минут түгесілуге таяғанда да жапонға (Маэдаға) жол бермеді.

Жоғарыда айтқан, 86 минутта қақпа бағанасы қазаққа жақ болды. Әйтпегенде, «Селтик» сол жерде Чемпиондар лигасының есігін қаққан-ды. Алайда қақпадан қиыс кеткен доп Темірланға болысып, жас таланттың күні туғанын меңзегендей. Өйткені ойын бойы таразыда бірде «жасылдардың» енді бірге «сары-қаралардың» мысы басты. Шабуылшы Жоржиньо қиыннан қиыстырып гол соққысы келді-ақ, бірақ болмады. Егор Сорокинның сауатты пастарына қарап, көз сүйсінді. 26 минутта «Қайрат» жұмыла алға ұмтылып, әдемі шабуыл ұйымдастырды. Осы ойынға арнайы дайындалып, ем-домы бойына дарыған Мата да тосқауылын сәтті құрыпты. «Бәрін айт та, бірін айт» «Селтик паркте» болсын, үйде болсын қорғаныстан қамал соққан Тапаловты айт. Еркін осы жолы да еркін көсіліп, қара жұмыстың бәрін істеді. Матч соңына қарай «Селтик» доп ампуласын өзгертіп, екінші қабаттан шабуылдауға кірісті. Қысымды айтарлықтай сезілді, білем. Қақпашы мен қорғаушылар «өліспей-беріспейміз» деп серттескендей. Қарсыластың төпелеген шабуылын, ойын динамикасын уақытында басып тұрды. «Слован» жерінде 120 минут айқасқандай, «Орталық стадионда» да белгіленген уақытта «тұрып» берді. Сөйтіп, айқұлақты трофейдің жолындағы тартысты кім жалғастырарын футбол «лотореясы» еншісіне қалдырды. Осы сәтте бар қазақ жанын шүберекке түйді.

Еуропа, қарашы, бұл – қазақтың баласы!

Расымен, «Селтикке» қарсы кездесуде Темірлан Анарбек бес сейв жасады. Талай қауіптің бетін қайтарды. Десе де, алғашқы таймда ақсағаны рас. Өйткені мұндай турнирдің мысы басады. Ал матчтың екінші жартысынан бастап, ритмге түсіп, тіпті бір сәт қақпада Касильяс тұрғандай елестеді. Неге Икердің атын еске түсірдік. Себебі Сезар Санчес жарақат алғанда 21 жастағы Касильяс ЧЛ финалында өнер көрсеткен. Ол-ол ма, сол жылы Каньисарес жарақат алып, ӘЧ-де бақ сынайды. Ирландиямен ойында пенальтиден жік шығармайды. Бертінде, 2014 жылы Бразилиядағы доп додасында Нидерланд пен Мексика түйісіп, матч пенальтиге дейін жалғасады. Сонда әккі Луи Вангал Яспер Силлесенді емес, Тим Крулды шығарып, оңтүстікамерикалықтарды үйіне қайтарады. Осылайша, қа​қпашы тағдыры қас-қағым сәтте түрленіп сала берген. «Селтикпен» бірінші кездесуде де Заруцкийдің жарақаты еңсемізді езген еді. Жас жүйрік Темірланға сенгендер аз-ды. Ол да Касильястай жарқ етіп, қарымта ойында үш бірдей пенальтиді қайтарды.

Қақпашы демекші, мына қызыққа қараңыз. «Қайраттың» иесі Қайрат Боранбаев осы ойында даңқты қақпашы Құралбек Ордабаевты бекер шақырмаған-ау. Клуб ардагерімен бірге отырып матч тамашалап, экс-қақпашы да Анарбекке батасын бергендей. Өйткені оны экс-Англия чемпионы Шмейхельдің мысы басқан жоқ. Төреші екеуіне қатар келіп, ережені тәптіштеп жатқанда қарсыласына көз қиығын да салмады. Оның жанында салмақ жинап алған Каспер қипақтап қалғандай. Оның үстіне Тағыберген мен Абаттың әлегін ұмытпаса керек. Темірланға қарағанда оның жүйкесі сыр бергені байқалды. 77 нөмірлі ойыншының бірінші пенальтиді ойдағыдай қайтаратынына кәміл сендік. Себебі пенальтиге аса сақтықпен дайындалғаны, осы сценарий бойынша жаттыққаны көрініп тұрды. Айданың соққысын қайтарғанда Алматы ұйқысынан оянды. Маккоуэнның қайда тебетінін тапқанда бір аяқпен ЛЧ табалдырығын аттадық. Негізі, Энгельс пен Маккрегордың да қайда соққы бағыттайтынын да білді. Бірақ жете алмады. Десе де, Маэданың көзқарасын «оқып», Еуропа жолдамасын «Селтиктің» қолына ұстатты. Сөйтіп, 21 жастағы академия түлегі «Қайраттың» атағын аспандатты.

Академия дегенде, бұл матчта тек Темірлан ғана емес, қорғаушы Мрынский мен Дамир Қасаболат, шабуылшы Рамазан Бағдат көзге түсті. Экстра тайма жарытлай қорғаушы Олжас Байбекті көрдік. Мрынскийдің матч бойы ортаны бермегені, Рамазан Бағдаттың қақпадан асыра тепкен соққысы есте қалды. Осымен-ақ, Бағдат өзінің болашағы бар ойыншы екеніне сендірді. Академия түлектерін көріп, жанкүйер де марқайып қалды. Себебі, бір кездері «Қайрат» халық командасы атанып, ұлт мерейін тасытқан-ды. Ел ішінде аталған клубтың егде жанкүйері көп. Солар алаңда, болмаса теледидар алдында көзіне жас алды, білем. Өйткені, шамамен 70 жыл тарихында алматылық клуб Еуропа асуын еңсерді. Бұл осы жолда тер төккен клуб басшылығы мен «Қайрат» деп бір сәт дамылдамаған жанкүйердің арқасы. Әрине, «елім деген ер болмаса» Алматы тамыз таңын ұйқысыз қарсы алмас еді...

Қош, «Қайрат» Чемпиондар лигасының жалпы кезеңінде сегіз ойын өткізеді. Қарсыластары 28 тамыз күні Монока қаласында анықталады. Бірінші себепте «Барселона» , «ПСЖ», «Реал», «Манчестер Сити», «Бавария», «Ливерпуль», «Интер», «Челси» және «Боруссия» клубы бар. Осы аталған командалардың екеуі «Қайратқа» қарсылас атанады. Жеребе жолдас болса, Еуропа алыптары Алматыға ат басын бұрады. Айтпақшы, «Олимпияға» қарсы ойында Мрынский, «Слован» жерінде Дастан Сәтпаев, «Селтикпен» матчта Мартынович туған күнін тойлады. Бейсенбідегі жеребе тарту рәсімінен кейін, ЛЧ кездесуін тағы бір ойыншының туған күніне туралауға «тапсырыс» береміз бе?